குமரி மாவட்ட புத்தகத் திருவிழா நிறைவு 

குமரி மாவட்ட மாவட்ட நிர்வாகம் சார்பில் நாகர்கோவிலில் 17.02.2024 முதல் 27.02.2024 வரை தொடர்ந்து 11 நாட்கள் புத்தக கண்காட்சி நடைபெற்றது. இக்கண்காட்சியில் பொதுஅறிவு, போட்டித்தேர்வுகளை எதிர்கொள்வது, வரலாற்று புத்தகங்கள், இலக்கியங்கள், கவிதை, நாவல்கள் உள்ளிட்ட பல்வேறு எழுத்தாளர்களின் படைப்புகள் சுமார் 100-க்கும் மேற்பட்ட அரங்குகளில் விற்பனைக்கு வைக்கப்பட்டது. புத்தக கண்காட்சியினை பல்லாயிரம் பேர் பார்வையிட்டதோடு, சுமார் ரூ.42 இலட்சம் மதிப்பில் புத்தகங்கள் விற்பனையானது.

நிறைவு நிகழ்ச்சியில் மாவட்ட ஆட்சித்தலைவர் பி.என்.ஸ்ரீதர் தலைமை வகித்தார். தொடர்ந்து ரோட்டரி சங்கத்தின் சார்பில் வழங்கிய புத்தகத்தினை மாவட்ட ஆதிதிராவிடர் மற்றும் பழங்குடியினர் நலத்துறையின் கீழ் செயல்படும் விடுதி மாணவர்களுக்கு வழங்கப்பட்டது. மேலும் பல்வேறு போட்டிகளில் வெற்றி பெற்ற பள்ளி கல்லூரி மாணவ மாணவியர்களுக்கு பரிசுகள், சிறப்பாக பணிபுரிந்த அலுவலர்களுக்கு நினைவு பரிசுகள் வழங்கப்பட்டன. நிகழ்ச்சியில் மாவட்ட வருவாய் அலுவலர் ஜெ.பாலசுப்பிரமணியம், நாகர்கோவில் மாநகராட்சி ஆணையர் நிஷாந்த் கிருஷ்ணா உட்பட பலர் கலந்து கொண்டனர்.