பச்சையம்மன் கோவிலில் நாளை கும்பாபிஷேகம்

காஞ்சிபுரம் ஒன்றியம், புஞ்சை அரசந்தாங்கல் கிராமத்தில் பச்சையம்மன் கோவில் உள்ளது. இக்கோவிலை புதுப்பித்து கும்பாபிஷேகம் நடத்த கிராம பொதுமக்கள் மற்றும் விழா குழுவினர் முடிவு செய்தனர். அதன்படி கோவிலில் பல்வேறு திருப்பணிகள் சமீபத்தில் செய்து முடிக்கப்பட்டது. கும்பாபிஷேகத்தையொட்டி இன்று காலை 8:00 மணிக்கு யாகசாலை பூஜை துவங்குகிறது. இதில், அனுக்ஞை, விக்னேஸ்வர பூஜை, மஹாலட்சுமி பூஜை, நவக்கிரஹ பூஜை, கோபூஜை, தனபூஜை, கணபதி மஹாலட்சுமி நவக்கிரஹ ஹோம் உள்ளிட்டவை நடக்கிறது. நாளை , காலை 8:00 மணிக்கு கலச புறப்பாடும், தொடர்ந்து கோபுரத்திற்கும், மூலவர் பச்சையம்மன் மற்றும் விநாயகர், முருகர், சிவன், நாகங்கள், நவக்கிரஹம், ஆஞ்சநேயர், ரேணுகாம்பாள், விஷ்ணு துர்கை அம்மன், வாழ்முனி, செம்முனை உள்ளிட்ட பரிவாரங்களுக்கு 8:30 மணிக்கு கும்பாபிஷேகம் நடக்கிறது. இரவு 7:00 மணிக்கு அம்மன் வீதியுலா நடக்கிறது.