லாரி- இருசக்கர வாகனம் மோதல் லாரி எரிந்தது

புதுக்கோட்டை மாவட்டம் வடவாளம் பாப்பங்கொல்லை கிராமத்தைச் சேர்ந்தவர் குமார் (34). லாரி ஓட்டுனரான இவர் புதுக்கோட்டையிலிருந்து அறந்தாங்கி செல்லும் சாலையில் உள்ள சேந்தான்குடி அருகே மரக்கட்டைகளை ஏற்றி கொண்டு லாரியை ஓட்டிச் சென்ற போது புதுக்கோட்டை மாவட்டம் அறந்தாங்கி அருகே உள்ள துவரடிமனை கிராமத்தைச் சேர்ந்த குமரேசன் (30) என்ற இளைஞர் ஒட்டி வந்த இருசக்கர வாகனத்தின் (புல்லட்) மீது மோதி விபத்துக்குள்ளானது. இந்த விபத்தில் இரு சக்கர வாகனம் தீப்பிடித்து எரிந்ததால் பரபரப்பு ஏற்பட்ட நிலையில் இரு சக்கர வாகனத்தில் பற்றிய தீ லாரியின் முன்பக்க பகுதியிலும் பரவி லாரியும் எரியத் தொடங்கியுள்ளது. இதில் அதிர்ஷ்டவசமாக உயிர் சேதங்கள் தவிர்க்கப்பட்ட நிலையில் இந்த விபத்தில் காயமடைந்த இருசக்கர வாகனத்தில் சென்ற குமரேசன் என்ற இளைஞர் புதுக்கோட்டை அரசு மருத்துவக் கல்லூரி மருத்துவமனைக்கு அழைத்துச் செல்லப்பட்டார். பின்னர் சம்பவ இடத்திற்கு சென்ற தீயணைப்புத் துறையினர் தண்ணீர் பீச்சி அடித்து இருசக்கர வாகனத்திலும் லாரியின் முன்பக்கத்திலும் பற்றிய தீயை அணைத்தனர். இந்த விபத்தால் புதுக்கோட்டை அறந்தாங்கி சாலையில் போக்குவரத்து பாதிக்கப்பட்ட நிலையில் பின்னர் போலீசார் விபத்துக்குள்ளான வாகனங்களை சாலையிலிருந்து அப்புறப்படுத்தி போக்குவரத்தை சரி செய்தனர். மேலும் இந்த விபத்து குறித்து வல்லத்திராகோட்டை போலீசார் விசாரணை நடத்தி வருகின்றனர்.