பால் வியாபாரி மர்ம மரணம்

தூத்துக்குடி மாவட்டம், கோவில்பட்டி அருகே உள்ள இனாம் மணியாச்சி வடக்கு தெருவை சேர்ந்த பாண்டி மகன் முருகன் (42). இவர் மனைவி மாரியம்மாள் (40). தம்பதி இருவரும் பால் வியாபாரிகள். முருகன் இரவு நேரத்தில் வீட்டிற்கு அருகே உள்ள மற்றொரு வீட்டில் தங்கி தூங்குவது வழக்கம். அதுபோல கலிங்கப்பட்டி அருகே உள்ள மகாதேவர்பட்டியில் உள்ள உறவினர் வீட்டுக்கு சென்று விட்டு, மறுநாள் வருவதும் வழக்கம்.

இந்நிலையில் நேற்று முன்தினம் காலையில் வீட்டை விட்டு சென்ற முருகன் வீட்டிற்கு வரவில்லையாம். அவர் மற்றொரு வீட்டில் இருப்பார் என குடும்பத்தினர் நினைத்தனர். இந்நிலையில் அவர் இனாம் மணியாச்சி சாய்பாபாகோவில் அருகே உள்ள தனியாருக்கு சொந்தமான தோட்டத்து கிணற்றில் பிணமாக கிடந்துள்ளார்.

இது குறித்து மாரியம்மாள் கொடுத்த புகாரின் பேரில் கோவில்பட்டி மேற்கு போலீஸ் இன்ஸ்பெக்டர் கிங்ஸ்லி தேவானந்த், சப்- இன்ஸ்பெக்டர் செந்தில்குமார் மற்றும் போலீசார், தீயணைப்பு படையினர் அவரது உடலை மீட்டு பிரேதபரிசோதனைக்காக மருத்துவமனைக்கு அனுப்பி வைத்தனர். இந்த சம்பவம் குறித்து காவல்துறையினர் விசாரணை மேற்கொண்டு வருகின்றனர்.