காணாமல் போன பெண் சடலமாக மீட்பு

தூத்துக்குடி மாவட்டம், சாத்தான்குளம் அருகே உள்ள கூவைகிணறு கிராமத்தைச் சோ்ந்தவா் பொன்பாண்டி மகன் அந்தோணிராஜ் (28). இவா் நாசரேத் அருகே உள்ள வெள்ளிரிக்காயூரணி கோயில்ராஜ் மகள் ஜான்சிராணி கீதாவை (27) எட்டு ஆண்டுகளுக்கு முன் காதலித்து திருமணம் செய்து கொண்டாா். இருவரும் நாசரேத் அருகே உள்ள தைலாபுரத்தில் வசித்து வந்தனா். இவா்களுக்கு இரண்டு குழந்தைகள் உள்ளனா்.

கடந்த 21ஆம் தேதி இரவு தைலாபுரத்தில் உள்ள வீட்டில் அந்தோணிராஜ், தூக்கிட்டு தற்கொலை செய்து கொண்டாா். இதுகுறித்து மெஞ்ஞானபுரம் போலீசார் விசாரித்தனா். அப்போது ஜான்சிராணி கீதா அங்கு இல்லாததால், நாசரேத் காவல் நிலையத்தில் கடந்த 22ஆம் தேதி புகாா் செய்தாா் கோயில்ராஜ். இது குறித்து போலீசார் வழக்குப் பதிவு செய்து விசாரித்து வந்தனா். இந்நிலையில், சாத்தான்குளம் பகுதியில் உள்ள தேரி காட்டுப்பகுதியில், துப்பட்டாவால் கழுத்து இறுக்கப்பட்டு, அழுகிய நிலையில் கிடந்த ஜான்சிராணி கீதா சடலத்தை போலீசார் நேற்று மீட்டனா்.

சம்பவ இடத்தை சாத்தான்குளம் டிஎஸ்பி அருள், தட்டாா்மடம் காவல் ஆய்வாளா் திருநாவுக்கரசு ஆகியோா் பாா்வையிட்டு விசாரணை நடத்தினா். மனைவியை கொலை செய்து காட்டு பகுதியில் போட்டுவிட்டு, வீட்டில் அந்தோணிராஜ் தற்கொலை செய்து கொண்டிருக்கலாம் என கூறப்படுகிறது. போலீசார் விசாரணை நடத்தி வருகின்றனா்.