நகராட்சி அதிகாரிகள் கடும் எச்சரிக்கை!

பழநி கோயிலில் கொண்டாடப்படும் முக்கிய திருவிழாக்களில் ஒன்று பங்குனி உத்திரம். இத்திருவிழா நேற்று முன்தினம் கொடியேற்றத்துடன் துவங்கியது. இத்திருவிழாவின் முக்கிய நிகழ்ச்சிகளான திருக்கல்யாணம் மார்ச் 23ம் தேதியும், தேரோட்டம் மார்ச் 24ம் தேதியும் நடைபெறவுள்ளது. இந்நிலையில் பக்தர்களின் நலன் கருதி பழநி நகரில் பிளாஸ்டிக் பொருட்கள் பயன்பாட்டிற்கு நகராட்சி நிர்வாகம் தடை விதித்துள்ளது. இதன் காரணமாக நகரில் பொதுமக்கள் மற்றும் வணிக நிறுவனங்கள் பிளாஸ்டிக் பொருட்கள் பயன்படுத்த வேண்டாமென தெரிவிக்கப்பட்டுள்ளது. இதனை மீறி பிளாஸ்டிக் பொருட்கள் விற்பனை செய்பவர்கள் மற்றும் பயன்படுத்துபவர்களை சுகாதார ஆய்வாளர்கள் மூலம் சோதனை செய்து பறிமுதல் மற்றம் அபராத நடவடிக்கை மேற்கொள்ளப்படுமென நகராட்சி அதிகாரிகள் எச்சரித்துள்ளனர்.