முத்துமாரியம்மன் கோவிலில் கூழ்வார்த்தல் விழா

காஞ்சிபுரம் சர்வதீர்த்தம் மேல்கரையில், முத்துமாரியம்மன் கோவில் உள்ளது. இக்கோவிலில் காஞ்சிபுரம் காமகோடி பீடாதிபதி சங்கர விஜயேந்திர சரஸ்வதி சுவாமிகளின், அனுக்கிரகத்துடன் 19ம் ஆண்டு கூழ்வார்த்தல் திருவிழா, கடந்த 10ம் தேதி, காலை 7:30 மணிக்கு கணபதி ஹோமம் மற்றும் சந்தனகாப்பு அலங்காரத்துடன் துவங்கியது. குமரகோட்டம் தலைமை அர்ச்சகர் காமேஸ்வர குருக்கள் தலைமையில் திருவிளக்கு பூஜை நடந்தது. நேற்று முன்தினம், மாலை 6:00 மணிக்கு காப்பு கட்டுதல் நிகழ்வு நடந்தது. தொடர்ந்து களியனுார் செல்லியம்மன் கலைகுழுவினரின் பம்பை, கைச்சிலம்பாட்ட நிகழ்ச்சியும், அம்மன் வர்ணிப்பும் நடந்தது. நேற்று, காலை 8:00 மணிக்கு சர்வதீர்த்த குளக்கரையில் இருந்து கரகம் மற்றும் பால்குடம் வீதியுலா நடந்தது. இதில், பக்தர்கள் தீச்சட்டி ஏந்தியும், உடலில் அலகு குத்தி அம்மனுக்கு நேர்த்திக்கடன் செலுத்தினர். மதியம் 12:00 மணிக்கு அம்மனுக்கு கூழ்வார்த்தலும், மாலை 4:00 மணிக்கு ஊரணி பொங்கல் வைத்தல் நிகழ்வும், இரவு 8:00 மணிக்கு அம்மனுக்கு கும்பம் படையலிடப்பட்டது. இன்று காலை 7:00 மணிக்கு அம்மனுக்கு மஞ்சள் நீராட்டு விழா நடக்கிறது.