பைக்கை திருடி செல்லும் மர்ம நபர் - சிசிடிவி வைரல்

தூத்துக்குடி மாவட்டம், ஸ்ரீவைகுண்டம் அருகே உள்ள செய்துங்கநல்லூரைச் சேர்ந்தவர் சந்தியாகு டேவிட். இவர் செய்துங்கநல்லூர் வாரச்சந்தை அருகே பலசரக்கு கடை நடத்தி வருகிறார். நேற்று இரவு கடையை அடைத்து விட்டு செய்துங்கநல்லூரில் உள்ள ஆர்.சி கோவில் முன்பு நிறுத்தி தனது இருசக்கர வாகனத்தை நிறுத்தி விட்டு பங்குத்தந்தையை பார்ப்பதற்காக உள்ளே சென்றுள்ளார்.

அந்த சமயத்தில் அதை நோட்டமிட்ட மர்ம நபர் ஒருவர் சர்ச் வாசல் முன்பு நின்று உள்ளே சென்றவர் தூரத்தில் நிற்பதை கவனித்து வேகமாக அவரது இருசக்கர வாகனத்தை திருடிச் செல்கிறார். தனது இருசக்கர வாகனம் ஸ்டார்ட் ஆகும் சத்தம் கேட்டு வேகமாக வெளியே வந்த சந்தியாகு டேவிட் தனது பைக்கை எடுத்துச் சென்றவரை வேகமாக பின்தொடர்ந்து பிடிக்க முயற்சித்தார்.

ஆனால் அவர் கண் இமைக்கும் நேரத்தில் வேகமாக பைக்கோடு தப்பியோடி விட்டார். இந்த சம்பவம் அந்த பகுதியில் இருந்த கண்காணிப்பு கேமராவில் பதிவாகி உள்ளது. இந்த காட்சிகளை கொண்டு சந்தியாகு டேவிட் செய்துங்கநல்லூர் காவல்நிலையத்தில் புகார் அளித்துள்ளார். புகாரின் அடிப்படையில் போலீசார் விசாரணை மேற்கொண்டு வருகின்றனர்.