நள்ளிரவில் டூவீலரை திருடிய மர்ம நபர்கள்; சிசிடிவி காட்சிகளால் பரபரப்பு

ஓசூர் லட்சுமி தேவி நகர் பகுதியில் வசித்து வருபவர் லோகேஷ், இவர் ஓசூர் சார் ஆட்சியர் அலுவலகம் அருகே போட்டோ ஸ்டூடியோ கடை நடத்தி வருகிறார். இவர் தான் பயன்படுத்தி வரும் இருசக்கர வாகனத்தை தனது வீட்டின் முன்பு எப்போதும் இரவு நேரத்தில் நிறுத்துவதை வழக்கமாக கொண்டுள்ளார். அதைப்போல நேற்று இரவும் வீட்டிற்கு சென்ற அவர் வீட்டின் முன்பு வழக்கம்போல இருசக்கர வாகனத்தை நிறுத்திவிட்டு வீட்டுக்கு தூங்க சென்றுள்ளார்.

அப்போது நள்ளிரவு நேரத்தில் சுமார் 2 மணி அளவில் தெருவில் இருசக்கர வாகனத்தில் சுற்றித்திரிந்த இரண்டு மர்ம நபர்கள் லோகேஷ் நிறுத்தி இருந்த இருசக்கர வாகனத்தின் லாக்கை உடைத்து வாகனத்தை திருடி சென்றனர். இந்த காட்சிகள் அங்கிருந்த சிசிடிவி கேமராவில் பதிவாகியுள்ளது.

பல ஆண்டுகளாக அந்த பகுதியில் வாழும் குடியிருப்புவாசிகள் தங்களது வாகனங்களை நிறுத்தி வருவது வழக்கமாக இருந்த போதிலும் இது முதல் திருட்டு என கூறப்படுகிறது. சிசிடிவி காட்சிகளை கொண்டு இந்த திருட்டு சம்பவம் குறித்து லோகேஷ் ஓசூர் அட்கோ காவல் நிலையத்தில் புகார் அளிக்க உள்ளதாக தெரிவித்தார்.