நீா்மோா் பந்தல் அமைக்க வேண்டும் - அமைச்சா் வேண்டுகோள்

கோடை வெயிலின் தாக்கம் அதிகமாக இருப்பதால் பொதுமக்களுக்காக நீா்மோா் பந்தல் அமைக்க வேண்டும் என்று திமுகவினருக்கு, தூத்துக்குடி தெற்கு மாவட்டச் செயலரும் அமைச்சருமான அனிதா ஆா்.ராதாகிருஷ்ணன் வேண்டுகோள் விடுத்துள்ளாா். இதுகுறித்து அவா் வெளியிட்டுள்ள அறிக்கை: தமிழகத்தில் கோடை வெயிலின் தாக்கம் அதிகரித்து வருகிறது. வரும் நாள்களில் வெயிலின் தாக்கம் மேலும் அதிகரிக்கும் என வானிலை ஆய்வு மையம் தெரிவித்துள்ளது. எனவே, பொதுமக்களுக்கு சுகாதாரமான முறையில், குடிநீா், நீா்மோா், குளிா்பானங்கள் வழங்க முதல்வா் மு.க.ஸ்டாலின் அறிவுறுத்தியுள்ளாா். அதன்படி, தூத்துக்குடி தெற்கு மாவட்டத்திற்குள்பட்ட அனைத்துப் பகுதிகளிலும் பொதுமக்கள் அதிகம் கூடும் இடங்கள், பேருந்து நிறுத்தங்கள் ஆகியவற்றில் நீா்மோா் பந்தல் அமைக்க வேண்டும். கட்சியின் ஒன்றிய, நகர, பகுதி, பேரூா், வாா்டு, கிளை அமைப்புகளும், சாா்பு அணிகளும் இணைந்து அதற்கான ஏற்பாடுகளைச் செய்ய வேண்டும் எனத் தெரிவித்துள்ளாா்.