பள்ளிக்கு முன் ஆக்கிரமிப்பு - கிராம மக்கள் சாலை மறியல்

திருவள்ளூர் மாவட்டம், திருத்தணி அருகில் உள்ள தாடூர் ஊராட்சியில் உள்ள சத்யா நகர் பகுதியில் ஊராட்சி ஒன்றிய தொடக்கப்பள்ளி செயல்படுகிறது .இந்த பள்ளி முன்பு சவுக்கு கட்டைகள், தென்னை ஓலைகள் போட்டு ஆக்கிரமிப்புகள் செய்வதால்பள்ளிக்குள் பாம்பு மற்றும் விஷ பூச்சிகள் வந்து விடுவதாகவும், மாணவர்களுக்கு பாதுகாப்பற்ற சூழல் உள்ளதாகவும் கிராம மக்கள் தொடர்ந்து அதிகாரிகளிடம் புகார் அளித்தும் நடவடிக்கை எடுக்கவில்லை. இதனால் அதிருப்தி அடைந்த கிராம மக்கள் 50க்கும் மேற்பட்டோர் திருத்தணி - வேலூர் மாநில நெடுஞ்சாலையில் மறியலில் ஈடுபட்டனர். அப்போது கோரிக்கைகளை வலியுறுத்தி முழக்கம் இட்டனர். சம்பவ இடத்திற்கு வந்த ஊராட்சி மன்ற தலைவர் மற்றும் வருவாய் துறை அதிகாரிகள் சாலை மறியல் செய்தவர்களிடம் பேச்சுவார்த்தை செய்தனர். இதனை அடுத்து சாலை மறியல் செய்தவர்கள் கலைந்து சென்றனர்.