தலைவாசல் அருகே தீப்பிடித்து ஆம்னி வேன் நாசம்

சேலம் மாவட்டம் கெங்கவல்லி வட்டம் தலைவாசல் அருகே கோவிந்தம்பாளையம் ஊராட்சி கம்பளிமேட்டை சேர்ந்தவர் முத்துவேல்,40. காய்கறி வியாபாரியான இவர் நேற்று, தலைவாசல் தின சரி மார்க்கெட்டுக்கு ஆம்னி வேனில் சென்றுவிட்டு, காலை, 10:00 மணிக்கு, தலைவாசல் -ஆறகளூர் சாலையில் திரும்பி வந்து கொண்டிருந்தார்.

மும்முடி விநாயகர் கோவில் அருகே வந்தபோது, 'காஸ்' கசிவால், வேன் தீப் பிடித்து எரியத்தொடங்கியது. உடனே முத்துவேல், வேனை நிறுத்திவிட்டு இறங்கினார்.

10:30 மணிக்கு, ஆத்துார் தீயணைப்பு நிலைய அலுவலர் அசோகன் தலைமையில் வீரர்கள், தீயை அணைக்கும் பணியில் ஈடுபட்டனர். ஆனால் வேன் முழுதும் எரிந்து நாசமானது. தலைவாசல் போலீசார் விசாரிக்கின்றனர்.