ஆட்டோ கவிழ்ந்து ஒருவர் உயிரிழப்பு

திருவள்ளூர் மாவட்டம் ஆர்.கே.பேட்டை அடுத்த சி.ஜி.என்.கண்டிகையைச் சேர்ந்தவர் முருகேசன், 60. இவர், நேற்று காலை கே.ஜி.கண்டிகை பஜாரில் இருந்து, பொருட்களை வாங்கிக் கொண்டு சரக்கு ஆட்டோவில் வீட்டிற்கு சென்றுக் கொண்டிருந்தார். அப்போது, கே.ஜி.கண்டிகை - நொச்சிலி நெடுஞ்சாலையில் உள்ள டாஸ்மாக் கடை அருகே, சரக்கு ஆட்டோ திடீரென தலைக்குப்புற கவிழ்ந்தது. ஆட்டோ ஓட்டுனர் காயமின்றி தப்பியோடினார். இதில் பலத்த காயம் அடைந்த முருகேசன், சிகிச்சைக்காக திருத்தணி அரசு மருத்துவமனையில் சேர்த்தனர். அங்கு, சிகிச்சை பலனின்றி நேற்று மாலை பரிதாபமாக உயிரிழந்தார். இதுகுறித்து வழக்குப் பதிந்த திருத்தணி போலீசார், ஆட்டோ ஓட்டுனரை தேடி வருகின்றனர். சரக்கு ஆட்டோவில், ஓட்டுனர் மற்றும் முருகேசன் ஆகிய இருவர் மட்டுமே பயணம் செய்தனர் என்பது குறிப்பிடத்தக்கது.