மோட்டார் சைக்கிளிலிருந்து தவறி விழுந்த பெயிண்டர் லாரி மோதி சாவு

சேலம் மாவட்டம் வாழப்பாடி அருகே மேட்டுப்பட்டி பகுதியை சேர்ந்தவர் தங்கராஜ். இவருடைய மகன் சக்திவேல் (வயது 27). பெயிண்டர். இவர் நேற்று மதியம் மல்லூர் அருகே நாழிக்கல்பட்டியில் உள்ள தனது உறவினர் வீட்டு நிகழ்ச்சிக்கு வந்தார். அங்கிருந்து நாழிக்கல்பட்டி அம்பேத்கர் நகரை சேர்ந்த சஞ்சய் என்பவருடன் மோட்டார் சைக்கிளில் சீலநாயக்கன்பட்டி பைபாசுக்கு சென்றுள்ளார். மோட்டார் சைக்கிளை சஞ்சய் ஓட்டிச் சென்றார்

. அவர்கள் சேலம்- நாமக்கல் தேசிய நெடுஞ்சாலையில் தாசநாயக்கன்பட்டி அருகே சென்ற போது திடீரென மோட்டார் சைக்கிள் நிலை தடுமாறி விபத்துக்குள்ளானது. இதில் மோட்டார் சைக்கிளில் சென்ற 2 பேரும் சாலையில் விழுந்தனர். அப்போது எதிர்பாராத விதமாக அவர்களுக்கு பின்னால் வந்த லாரி சக்திவேல் மீது ஏறி இறங்கியது. இதில் சம்பவ இடத்திலேயே சக்திவேல் பரிதாபமாக உயிரிழந்தார்.

பலத்த காயம் அடைந்த சஞ்சையை அக்கம்பக்கத்தினர் மீட்டு சிகிச்சைக்காக மருத்துவமனைக்கு அனுப்பி வைத்தனர். விபத்து குறித்து தகவல் அறிந்த மல்லூர் போலீசார் சம்பவ இடத்திற்கு விரைந்து வந்து சக்திவேலின் உடலை மீட்டு பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனர். மேலும் இந்த விபத்து குறித்து வழக்கு பதிவு செய்து விசாரணை நடத்தி வருகின்றனர்.