பிரதமர் மோடி வருகை - விமான நிலையத்தில் 5 அடுக்கு பாதுகாப்பு!

கோவை:நாடாளுமன்றத் தேர்தல் தேதி அறிவிக்கப்பட்டுள்ள நிலையில் தென் மாநிலங்களில் தேர்தல் பரப்புரை சூடுபிடிக்க துவங்கியுள்ளது.அந்த வகையில் பிரதமர் மோடி ஆந்திரா,கர்நாடகா,தமிழ்நாடு மற்றும் கேரள மாநிலங்களில் தேர்தல் பிரச்சாரத்தை துவக்கியுள்ளார்.இன்று மாலை விமானம் மூலம் கோவை வரும் பிரதமர் மோடி கோவை சாய்பாபா காலனி சந்திப்பில் இருந்து ஆர்.எஸ் புரம் வரை பாஜக சார்பில் நடைபெறும் வாகன பேரணியில் பங்கேற்று பொதுமக்களிடம் வாக்கு சேகரிக்கிறார்.பிரதமர் மோடியின் கோவை வருகையை ஒட்டி விமான நிலையத்தில் 5 அடுக்கு பாதுகாப்பு போடப்பட்டுள்ளது. தொடர்ந்து விமான நிலையத்திற்கு உள்ளே வரும் வாகனங்கள் தீவிர சோதனைக்கு உட்படுத்தப்பட்ட பிறகே அனுமதிக்கப்படுகின்றன.விமான நிலையத்திலிருந்து பிரதமர் மோடி செல்லும் பாதையில் மத்திய ரிசர்வ் மற்றும் மாநில போலீசார் பாதுகாப்பு மற்றும் கண்காணிப்பு பணியில் ஈடுபட்டு இருக்கிறார்கள்.மோப்ப நாய்கள்,மெட்டல் டிடெக்டர் உதவியுடன் வெடிகுண்டு நிபுணர்கள் விமான நிலைய வளாகத்தில் தீவிர சோதனையில் ஈடுபட்டு வருகிறார்கள்.5 நிமிடத்துக்கு ஒருமுறை மோப்ப நாய்கள் உதவியுடன் சோதனை மேற்கொண்டு வருகிறார்கள்.விமான நிலையத்தை சுற்றிலும் 500க்கும் மேற்பட்ட மத்திய ரிசர்வ் மற்றும் மாநில போலீசார் பாதுகாப்பு பணியில் ஈடுபட்டு வருகின்றனர்.100 மீட்டர் தொலைவுக்கு ஒரு காவலர் என்ற விகிதத்தில் விமான நிலையத்தை சுற்றி உள்ள பகுதிகளில் காவலர்கள் பாதுகாப்பு பணியில் ஈடுபட்டு வருகின்றனர். அதேபோல பிரதமர் பயணிக்கும் சாலைகளில் போக்குவரத்து மாற்றம் செய்யப்பட்டுள்ளது. கோவை மாநகர் முழுவதும் பிரதமரின் வருகைக்காக சுமார் 4500 காவலர்கள் பாதுகாப்பு மற்றும் கண்காணிப்பு பணிகளில் ஈடுபடுத்தப்பட்டுள்ளது குறிப்பிடத்தக்கது.