காஞ்சியில் போலீஸ் கொடி அணிவகுப்பு

காஞ்சிபுரம் லோக்சபா தொகுதிக்கான தேர்தல், ஏப். 19ல் நடைபெற உள்ளது. இதற்கான பாதுகாப்பு ஏற்பாடுகளை, எஸ்.பி.,சண்முகம் தலைமையிலான போலீஸ் அதிகாரிகள் மேற்கொண்டு வருகின்றனர்.

தேர்தலுக்கான போலீஸ் பார்வையாளர், ஐ.பி.எஸ்., அதிகாரி பரத்ரெட்டி நேற்று காஞ்சிபுரம் வந்தார். கலெக்டர் கலைச்செல்வியிடம் பாதுகாப்பு ஏற்பாடு குறித்து பேசினார். இதையடுத்து, காஞ்சிபுரம் காந்திரோட்டில், போலீஸ் கொடி அணிவகுப்பு நடந்தது.

இதில், மத்திய தொழிலக பாதுகாப்பு படைவீரர்கள் 100 பேரும், உள்ளூர் போலீசார் 200 பேரும் என, 300 பேர் பங்கேற்றனர். மாவட்ட எஸ்.பி.,சண்முகம் இந்த கொடி அணிவகுப்பை துவக்கி வைத்தார். காந்திரோட்டில் துவங்கிய கொடி அணிவகுப்பு, மடம் தெரு, பிள்ளையார்பாளையம், கைலாசநாதர் கோவில், புத்தேரி தெரு வழியாக, எஸ்.எஸ்.கே.வி., பள்ளியில் முடிந்தது."