லாரி மீது தனியார் பேருந்து மோதி விபத்து - 15 பேர் படுகாயம்

வேலூர் அடுத்த கருகம்பத்தூர் பெங்களூர் - சென்னை தேசிய நெடுஞ்சாலையில், குடியாத்தத்தில் நெல் மூட்டைகளை இறக்கிவிட்டு செங்கல்பட்டு நோக்கி சென்ற லாரியின் ஜாயிண்ட் கட்ஆகி சாலையின் ஓரம் நிறுத்தப்பட்டுள்ளது. அப்போது, குடியாத்தத்தில் இருந்து வேலூர் சென்ற தனியார் பேருந்து எதிர்பாராத விதமாக பழுதாகி நின்றுகொண்டிருந்த லாரியின் பின்பக்கம் மோதியதில் பேருந்தின் ஓட்டுனர் உட்பட பயணிகள் சுமார் 15 பேர் படுகாயம் அடைந்தனர்.

பின்னர்,அப்பகுதி மக்கள் காயமடைந்தவர்களை மீட்டு 108 ஆம்புலன்ஸ் மூலம் வேலூர் அரசு மருத்துவமனைக்கு அனுப்பிவைத்தனர். தகவல் அறிந்து சம்பவ இடத்திற்கு வந்த விரிஞ்சிபுரம் காவல் துறையினர் விபத்து தொடர்பாக வழக்கு பதிவு செய்து விசாரணை மேற்கொண்டு வருகின்றனர். விபத்தினால் சிறிது நேரம் போக்குவரத்து பாதிக்கப்பட்டது.