ஸ்ரீவில்லிபுத்தூர் அருகே தனியார் பஸ்கள் மோதல்: 10க்கும் மேற்பட்டோர் காயம்

விருதுநகர் மாவட்டம் ஸ்ரீவில்லிபுத்தூர் அருகே வத்திராயிருப்பில் இருந்து கூமாப்பட்டி செல்லும் மூலக்கரை பெரியகுளம் கண்மாய் சாலையில் கூமாப்பட்டியில் இருந்து வத்திராயிருப்பு நோக்கி பயணிகளை ஏற்றிக்கொண்டு வந்த தனியார் பேருந்தும் வத்திராயிருப்பில் இருந்து கூமாபட்டி நோக்கி சிவகாசியில் இயங்கக் கூடிய தனியார் பட்டாசு ஆலை பணியாளர்களை இறக்கிவிடுவதற்காக வந்த பேருந்தும் நேருக்கு நேர் மோதிக் கொண்டன .

இந்த விபத்தில் 15 க்கும் மேற்பட்டோருக்கு காயங்கள் ஏற்பட்ட நிலையில் சம்பவ இடத்திற்கு வந்த வத்திராயிருப்பு மற்றும் கூமாபட்டி காவல்துறையினர் விபத்தில் சிக்கிய பயணிகளை மீட்டு சிகிச்சைக்காக வத்திராயிருப்பு அரசு மருத்துவமனைக்கு அனுப்பி வைத்தனர்.

காவல்துறையினர் விசாரணையில் எதிர்பாராத விதமாக பட்டாசு ஆலை பேருந்தின் பிரேக் சரிவர இயங்காததால் இரண்டு பஸ்களும் நேருக்கு நேர் மோதியதாக கூறப்படுகிறது. மேலும்கூமாபட்டிக்கு செல்லக்கூடிய மூலக்கரை சாலையில் இருபுறமும் பெரியகுளம் மற்றும் வீராகசமுத்திரம் கண்மாய்கள் அமைந்து உள்ள இடங்களில் விபத்துக்குள்ளன பேருந்து கண்மாய்க்குள் கவிழ்ந்திருந்தால் பெரும் உயிர் சேதம் ஏற்பட்டிருக்கும் எனவும்,

நல்வாய்ப்பாக பேருந்து கண்மாய்க்குள் கவிழாமல் தடுப்பில் மோதி நின்றதால் பெரும் விபத்து தவிர்க்கப்பட்டது. இச்சம்பவம் குறித்து கூமாபட்டி காவல்துறையினர் வழக்கு பதிவு செய்து விசாரணை மேற்கொண்டு வருகின்றனர்.