வேலூர் தொகுதி திமுக வேட்பாளர் கதிர்ஆனந்த் சொத்து விவரங்கள்!

வேலூர் நாடாளுமன்ற தொகுதியில் தி.மு.க. வேட்பாளராக போட்டியிடும் கதிர் ஆனந்த் வேட்புமனு தாக்களில் தெரிவித்துள்ள சொத்து விவரங்கள் பின்வருமாறு: கதிர் ஆனந்த் மனைவி சங்கீதா. இவர்களுக்கு செந்தாமரை, இலக்கியா என்று 2 மகள்களும், இளவரசன் என்ற மகனும் உள்ளனர். கதிர் ஆனந்த் கையிருப்பு தொகையாக ரூ.19 லட்சத்து 30 ஆயிரத்து 16-ம், சங்கீதாவிடம் ரூ.8 லட்சத்து 83 ஆயிரத்து 879-ம், செந்தாரையிடம் ரூ.5 லட்சத்து 40 ஆயிரத்து 317-ம் உள்ளது. வங்கிக்கணக்குகளில் கதிர்ஆனந்த் ரூ.16 கோடியே 74 லட்சத்து 90 ஆயிரத்து 596-ம், சங்கீதா ரூ.69 லட்சத்து 54 ஆயிரத்து, 438-ம், செந்தாமரை ரூ.32 லட்சத்து 24 ஆயிரத்து 35-ம் இருப்பு வைத்துள்ளனர். கதிர் ஆனந்திடம் 3,664 கிராம் தங்கம், 3 காரட் வைரம், 31 கிலோ 702 கிராம் வெள்ளியும், சங்கீதாவிடம் 1,003 கிராம் தங்கம், 1½ காரட் வைரம், 10,868 கிராம் வெள்ளியும், செந்தாமரையிடம் 975 கிராம் தங்க நகைகள் உள்ளன. கதிர்ஆனந்திடம் மோட்டார் சைக்கிள்கள், கார்கள், டிராக்டர் உள்பட 12 வாகனங்களும், சங்கீதாவிடம் 3 வாகனங்களும் உள்ளன. பல்வேறு வங்கிக்கணக்குகளில் உள்ள இருப்புத்தொகை, வைப்புத்தொகை, பங்கு முதலீடு என்று அசையும் சொத்துகளாக கதிர் ஆனந்திடம் ரூ.32 கோடியே 77 லட்சத்து 55 ஆயிரத்து 392-ம், சங்கீதாவிடம் ரூ.7 கோடியே 40 லட்சத்து 26 ஆயிரத்து 873-ம், செந்தாமரையிடம் ரூ.87 லட்சத்து 70 ஆயிரமும் உள்ளன. வேலூர் மாவட்டத்தில் சென்னை, வேலூர், காட்பாடி, ஈரோடு, குமிடிப்பூண்டி சிப்காட் வளாகம், ஏலகிரி உள்பட பல்வேறு இடங்களில் நிலங்கள், காலிமனைகள், கட்டிடங்கள், அடுக்குமாடி குடியிருப்புகள் என்று கதிர் ஆனந்த் பெயரில் அசையா சொத்து ரூ.35 கோடியே 81 லட்சமும், சங்கீதா பெயரில் ரூ.35 கோடியே 34 லட்சமும், செந்தாமரை பெயரில் ரூ.97 லட்சத்து 86 ஆயிரமும் உள்ளன. கதிர்ஆனந்துக்கு ரூ.6½ கோடியும், சங்கீதாவிற்கு ரூ.43 கோடியே 48 லட்சமும், செந்தாமரைக்கு ரூ.1 கோடியே 17 ஆயிரமும் கடன் உள்ளன, என தெரிவிக்கப்பட்டுள்ளது.