பள்ளிக்கு சுற்றுச்சுவர் கட்டித்தர பொதுமக்கள் கோரிக்கை

சங்கராபுரம் அடுத்த கல்வராயன்மலை ஒன்றியத்தைச் சேர்ந்த பழையபாலப்பட்டு கிராமத்தில் ஊராட்சி ஒன்றிய தொடக்க பள்ளி உள்ளது. இப்பள்ளியில் 50க்கும் மேற்பட்ட மாணவ, மாணவியர்கள் படித்து வருகின்றனர். 2 ஆசிரியர்கள் பணிபுரிகின்றனர். இப்பள்ளியில் பழுதடைந்த கட்டடத்தை இடித்துவிட்டு புதிய கட்டடம் கட்டுவதற்காக கடந்த 3 ஆண்டுகளுக்கு முன் சுற்றுச்சுவர் இடிக்கப்பட்டது.

அதன்பிறகு இதுவரை சுற்றுச்சுவர் கட்டப்படவில்லை. இதனால், பள்ளி நேரங்களில் கால்நடைகள் சுற்றித்திரிகின்றன. இதனால், மாணவர்கள் படிப்பில் கவனம் செலுத்த முடியாத நிலை ஏற்படுகிறது. மேலும், இரவு நேரங்களில் குடி பிரியர்கள் பள்ளி அறைகளில் மது அருந்துகின்றனர். பள்ளிக்கு சுற்றுச்சுவர் அமைக்க வேண்டும் என அதிகாரிகளிடம் பல முறை கோரிக்கை விடுத்தும் இதுவரை நடவடிக்கை எடுக்கப்படவில்லை.

இனியும் தாமதிக்காமல் பழையபாலப்பட்டு ஊராட்சி ஒன்றிய தொடக்க பள்ளிக்கு சுற்றுச்சுவர் கட்ட அதிகாரிகள் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.