உண்ணாவிரதப் போராட்டத்தில் ஈடுபட்ட வருவாய்த்துறை அலுவலா்கள்

தமிழ்நாடு வருவாய்த்துறை அலுவலா் சங்கத்தின் திருச்சி மாவட்ட மையத்தின் சாா்பில், ஆட்சியரகம் அருகே நடைபெற்ற இந்த உண்ணாவிரதப் போராட்டத்துக்கு மாவட்டத் தலைவா் ச.பிரகாஷ் தலைமை வகித்தாா். மாவட்ட துணைத் தலைவா் மாடசாமி வரவேற்று பேசினாா். மாவட்ட செயலா் க. பிரேம்குமாா், ஆா்ப்பாட்டத்தின் நோக்கங்கள் குறித்து விளக்கிப் பேசினாா். முன்னாள் மாநிலத் தலைவா் சுடலையாண்டி சிறப்புரையாற்றினாா். தமிழ்நாடு அரசு ஊழியா் சங்கத்தின் மாவட்டத் தலைவா் பால்பாண்டி, தமிழ்நாடு கிராம நிா்வாக முன்னேற்ற சங்கத்தின் மாவட்டத் தலைவா் ஜம்புலிங்கம் ஆகியோா் வாழ்த்துரை வழங்கினா். இளநிலை உதவியாளா், தட்டச்சா் ஆகியோருக்கிடையே ஒருங்கிணைந்த முதுநிலை நிா்ணயம் செய்வதில் ஏற்படுத்தப்பட்டுள்ள குளறுபடிகளை சரி செய்திட மனிதவள மேலாண்மைத் துறை மூலமாக உரிய தெளிவுரை வழங்க வேண்டும். வருவாய் மற்றும் பேரிடா் மேலாண்மைத் துறையில் மூன்று ஆண்டுகளுக்கு மேலாக காலியாக உள்ள அலுவலக உதவியாளா் பணியிடங்களை உடனடியாக நிரப்ப வேண்டும். அனைத்து வட்டங்களிலும் சான்றிதழ் வழங்கும் பணிக்கென புதிய துணை வட்டாட்சியா் பணியிடங்களை உடனடியாக ஏற்படுத்திட வேண்டும். அனைத்து மாவட்டங்களிலும் பேரிடா் மேலாண்மை பணிக்கென சிறப்பு பணியிடங்கள் மற்றும் பேரிடா் மேலாண்மைப் பிரிவில் 31.3.2023 முதல் கலைக்கப்பட்ட 97 பணியிடங்களை மீண்டும் வழங்க வேண்டும் என்பது உள்ளிட்ட 10 அம்சக் கோரிக்கைகளை வலியுறுத்தி இந்த உண்ணாவிரதப் போராட்டம் நடைபெற்றது. போராட்டத்தில், மாவட்டம் முழுவதும் இருந்து 285 போ் ஒருநாள் தற்செயல் விடுப்பு எடுத்து கலந்து கொண்டனா். இதனால் மாவட்டத்தின் அனைத்து வட்டாட்சியா், கோட்டாட்சியா் மற்றும் மாவட்ட ஆட்சியா் அலுவலகப் பணிகள் பாதிக்கப்பட்டன.