சாலை விபத்து: தொழிலாளி உயிரிழப்பு !

தஞ்சாவூர் அருகே போக்குவரத்தைச் சீர்ப்படுத்துவதற்காக அமைக்கப்பட்டுள்ள இரும்பு தடுப்பு மீது மொபெட் மோதியதில் கூலித் தொழிலாளி உயிரிழந்தார். தஞ்சாவூர் மாவட்டம், பூதலூர் அருகேயுள்ள துருசிப்பட்டியைச் சேர்ந்தவர் சி.லட்சுமணன் (50). கூலித் தொழிலாளி.

இவர் நாட்டரசன்கோட்டையிலுள்ள தனது உறவினர் வீட்டுக்குச் செல்வதற்காக மொபெட்டில் சென்று கொண்டிருந்தார். திருமலைசமுத்திரம் அருகே சாஸ்த்ரா நிகர்நிலைப் பல்கலைக்கழகம் பகுதியில் சென்றபோது, கட்டுப்பாட்டை இழந்த மொபெட் போக்குவரத்தைச் சீர்ப்படுத்துவதற்காக அமைக்கப்பட்டுள்ள இரும்பு தடுப்பு மீது மோதியது.

இதனால், பலத்த காயமடைந்த லட்சுமணன் தஞ்சாவூர் மருத்துவக்கல்லூரி மருத்துவமனையில் சேர்க்கப்பட்டார். அங்கு இவர் சிகிச்சை பலனின்றி உயிரிழந்தார். இது குறித்து வல்லம் காவல் நிலையத்தினர் வழக்குப் பதிந்து விசாரணை மேற்கொண்டுள்ளனர்.