பேருந்து நிலையத்தில் இளைஞரிடம் கொள்ளை - காவல்துறை விசாரணை

சேலம் டி.வி.எஸ். பஸ் நிறுத்தம் அருகே கத்தி முனையில் வாலிபரிடம் செல்போன், பணம் பறித்து சென்ற 2 பேரை போலீசார் வலைவீசி தேடி வருகின்றனர். சேலத்தை சேர்ந்த 30 வயது வாலிபர் ஒருவர் வெளியூர் சென்று விட்டு நேற்று முன்தினம் நள்ளிரவு சேலம் புதிய பஸ் நிலையத்திற்கு வந்தார். பின்னர் அவர் 4 ரோடு அருகே உள்ள வீட்டிற்கு செல்வதற்காக அங்கிருந்து நடந்து வந்தார். அவரை பின் தொடர்ந்து 2 பேர் வந்தனர். டி.வி.எஸ். பஸ் நிறுத்தம் அருகே வந்தபோது திடீரென்று 2 பேரும், வாலிபரை தடுத்து நிறுத்தி மிரட்டினர். பின்னர் அவரை தாக்கி கத்தியை காண்பித்து, அவரிடம் இருந்த செல்போன் மற்றும் பணத்தை பறித்துச்சென்றனர். இது குறித்த புகாரின் பேரில் பள்ளப்பட்டி போலீசார் வழக்குப்பதிவு செய்து சம்பவம் நடந்த இடத்திற்கு சென்று விசாரணை நடத்தினர். பின்னர் அந்த பகுதியில் உள்ள கண்காணிப்பு கேமரா பதிவுகளை வைத்து, வாலிபரிடம் கத்தி முனையில் செல்போன், பணம் பறித்து சென்ற மர்ம ஆசாமிகள் 2 பேரை போலீசார் வலைவீசி தேடி வருகின்றனர். வெளியூர் சென்று விட்டு புதிய பஸ் நிலையத்தில் இருந்து நள்ளிரவில் அருகில் உள்ள வீடுகளுக்கு செல்ல சிலர் நடந்து செல்கின்றனர். அப்போது அவர்களை பின் தொடர்ந்து வந்து தாக்கி பணம், நகை பறிப்பு சம்பவங்கள் அடிக்கடி அரங்கேறுகின்றன. எனவே டி.வி.எஸ். பஸ் நிறுத்தம், 4 ரோடு, அண்ணா பூங்கா ஆகிய பகுதிகளில் நள்ளிரவில் போலீஸ் ரோந்து பணியை தீவிரப்படுத்த வேண்டும் என்று பொதுமக்கள் கோரிக்கை விடுத்துள்ளனர்.