சேலம் : செவ்வாய்பேட்டை பகுதியில் கஞ்சா விற்ற வாலிபர் கைது

சேலம் செவ்வாய்பேட்டை நெய்மண்டி அருணாச்சலம் தெரு அருகே கஞ்சா விற்பதாக செவ்வாய்பேட்டை போலீசாருக்கு தகவல் கிடைத்தது. அதன்பேரில் நேற்று முன்தினம் சப்-இன்ஸ்பெக்டர் தமிழ்மணி தலைமையில் போலீசார் அந்த பகுதியில் ரோந்து பணியில் ஈடுபட்டனர். அப்போது அங்கு சந்தேகத்துக்கு இடமளிக்கும் வகையில் 3 வாலிபர்கள் நின்று கொண்டிருந்தனர். போலீசாரை பார்த்ததும் அவர்கள் அங்கிருந்து தப்பி ஓட முயன்றனர். அதில் ஒருவர் போலீசாரிடம் சிக்கினார். போலீசார் விசாரணையில் அவர் அதே பகுதியை சேர்ந்த ராஜா (29) என்பது தெரியவந்தது. மேலும் அவரிடம் இருந்து ஒரு கிலோ கஞ்சா பறிமுதல் செய்யப்பட்டது. தப்பி ஓடிய 2 பேரை போலீசார் தேடி வருகின்றனர்.