சேலம் : அரசு பள்ளி ஆய்வக உதவியாளர்களுக்கான இடம் மாறுதல் கலந்தாய்வு

தமிழகம் முழுவதும் நேற்று அனைத்து மாவட்டங்களிலும் ஆய்வக உதவியாளர்களுக்கு கலந்தாய்வு நடத்தப்பட்டது. அந்த வகையில் சேலம் வருவாய் மாவட்ட அளவில் பள்ளி கல்வித்துறையில் உள்ள அரசு உயர்நிலை மற்றும் மேல்நிலைப்பள்ளிகளில் உள்ள அறிவியல் ஆய்வகங்களில் பணிபுரியும் ஆய்வக உதவியாளர்களுக்கான மாறுதல் கலந்தாய்வு சேலம் கோட்டை அரசு மகளிர் மேல்நிலைப்பள்ளியில் நேற்று நடைபெற்றது. இந்த கலந்தாய்வில் அரசு உயர்நிலை மற்றும் மேல்நிலைப்பள்ளிகளில் பணிபுரியும் 261 ஆய்வக உதவியாளர்களில் 58 பேர் கலந்து கொண்டனர். பின்னர் காலியாக உள்ள பள்ளிகளின் அடிப்படையில் 19 ஆய்வக உதவியாளர்களுக்கு அவரவர் விருப்பத்தின் பேரில் மாறுதல் வழங்கப்பட்டது. இதனை தொடர்ந்து இடமாறுதலுக்கான ஆணைகளை மாவட்ட முதன்மை கல்வி அலுவலர் கபீர், சம்பந்தப்பட்ட ஆய்வக உதவியாளர்களுக்கு வழங்கினார். அப்போது, மாவட்ட கல்வி அலுவலர் மோகன் மற்றும் கல்வித்துறை அதிகாரிகள் உடனிருந்தனர்.