நாமக்கல்லில் ஸ்கூல் பேக், ஸ்டேஷனரி பொருட்கள் விற்பனை ஜோர்!

தமிழகம் முழுவதும் (ஜூன்-10) பள்ளிகள் திறக்கப்படவுள்ளன. பள்ளிகள் திறப்பையொட்டி, நாமக்கல் குளக்கரை வீதி, கடைவீதி மற்றும் நாமக்கல் நகரில் உள்ள கடைகளில் ஸ்கூல் பேக், லஞ்ச் பேக், ஸ்டீல் வாட்டர் பாட்டில், டிபன் பாக்ஸ், நோட்டு புத்தகம், ரெயின் கோட், லஞ்ச் டவல், ஷு ஆகியவற்றின் விற்பனை படுஜோராக நடந்து வருகிறது.

நேற்று சனிக்கிழமை விடுமுறை நாள் மற்றும் வார சம்பளம் என்பதால், அனைத்துக் கடைகளிலும் பொதுமக்கள் கூட்டம் அதிகமாக காணப்பட்டது.மாணவர்கள், குழந்தைகளைக் கவரும் வகையில் பல்வேறு வண்ணங்களிலான பேக்குகள் விற்பனைக்கு வைக்கப்பட்டிருந்தன. ஹல்க், ஸ்பைடர்மேன், பவர் ரேஞ்சர்ஸ், மெர்மைட்ஸ், யுனிகார்ன், பார்பி கேர்ள், டோரா புஜ்ஜி, சின்சான் உள்ளிட்ட கார்ட்டூன் பேக்குகள் குழந்தைகளிடையே, அதிக வரவேற்பைப் பெற்றுள்ளன.

நாமக்கல் குளக்கரை வீதியில் உள்ள ஆல்வின் பேக்ஸ் உரிமையாளர் சங்கர் கூறுகையில், 'கடந்த சில நாட்களாக ஸ்கூல் பேக், லஞ்ச் பேக் விற்பனை அமோகமாக நடைபெற்று வருகிறது. இங்கு நாங்களே பேக்குகளை தைத்து விற்பனை செய்து வருவதால், குறைந்த விலைக்கு விற்க முடிகிறது. 300 ரூபாய் முதல் 2 ஆயிரத்து 500 ரூபாய் வரை பேக்குகள் உள்ளன. கார்ட்டூன் அச்சிடப்பட்ட பேக்குகள் குழந்தைகளின் கவனத்தை ஈர்த்துள்ளன என்றார்.