சேலம் வேலைவாய்ப்பு அலுவலகத்தில் குரூப்-4 தேர்வுக்கான மாதிரி தேர்வு

சேலம் கோரிமேட்டில் மாவட்ட வேலைவாய்ப்பு மற்றும் தொழில் நெறி வழிகாட்டு மையம் உள்ளது. இந்த மையத்தில் டி.என்.பி.எஸ்.சி., டி.ஆர்.பி., போலீஸ் சப்-இன்ஸ்பெக்டர் உள்ளிட்ட அரசு பணி தேர்வுகளுக்கு இலவச பயிற்சி வழங்கப்பட்டு வருகிறது.

அதன்படி, நடப்பாண்டு டி.என்.பி.எஸ்.சி. குரூப்-4 தேர்வுக்கு மாவட்ட வேலைவாய்ப்பு அலுவலகத்தில் இலவச பயிற்சிகள் நடத்தப்பட்டு வருகின்றன. இதில், மாவட்டத்தின் பல்வேறு பகுதிகளில் இருந்து இளைஞர்கள், பெண்கள் கலந்து கொண்டு பயிற்சி பெற்று வருகின்றனர். இந்நிலையில், மாவட்ட வேலைவாய்ப்பு மற்றும் தொழில் நெறி வழிகாட்டு மையத்தில் நேற்று குரூப்-4 தேர்வுக்கான முழு மாதிரி தேர்வு நடத்தப்பட்டது. இந்த தேர்வில் 142 பேர் ஆர்வமுடன் கலந்து கொண்டு எழுதினர்.

தேர்வர்களுக்கு குரூப்-4 தேர்வில் எந்த மாதிரியான கேள்விகள் கேட்கப்படும்? அதை எப்படி எதிர்கொள்வது? என்பது குறித்து இந்த மாதிரி தேர்வு நடத்தப்பட்டதாக அதிகாரிகள் தெரிவித்தனர். இந்த தேர்வுக்கான ஏற்பாடுகளை மாவட்ட வேலைவாய்ப்பு துணை இயக்குனர் மணி, மாவட்ட வேலைவாய்ப்பு அலுவலர் தொண்டீஸ்வரன் ஆகியோர் செய்திருந்தனர்.