பள்ளி வேன் கவிழ்ந்து விபத்து - வெளியான சிசிடிவி காட்சிகள்!

கோவை மாவட்டம் சூலூர் அடுத்த நீலாம்பூரில் சைதன்யா என்ற தனியார் பள்ளி செயல்பட்டு வருகிறது.இந்தப் பள்ளியில் பட்டணம் மற்றும் அதன் சுற்றுவட்டார பகுதிகளை சேர்ந்த ஏராளமான மாணவிகள் பயின்று வருகின்றனர். இந்த நிலையில் இன்று காலை இப்பள்ளி வாகனம் வழக்கம்போல பட்டணம் பகுதியிலிருந்து சஞ்சய், திவ்யா,தனிஷ்கா,பிரணவ் ஆகிய 4 மாணவர்களை ஏற்றிக்கொண்டு நாகம்மநாயக்கன்பாளையம் வழியாக ஜே.ஜே நகரில் மாணவ மாணவிகளை ஏற்றுவதற்காக சென்று கொண்டிருந்தது.ஜே.ஜே நகர் செல்லும் 30 அடி அகல மண் சாலையில் சென்று கொண்டிருந்தபோது எதிரே வந்த இருசக்கர வாகனத்திற்கு வழி விடுவதற்காக ஓட்டுநர் சாலை வலது புறமாக வாகனத்தை நிறுத்த முயன்றார்.வாகனத்தின் பாரம் தாங்காமல் சாலையின் பக்கவாட்டில் மண் சரிந்ததால் பள்ளி வாகனம் 7 அடி பள்ளத்தில் கவிழ்ந்து விபத்துக்குள்ளானது. அவ்வழியாக சென்ற வாகன ஓட்டிகள்,பேருந்தில் இருந்து அனைவரையும் உடனடியாக மீட்டனர்.இந்த விபத்தில் மாணவர்களில் சஞ்சய் என்ற மாணவருக்கு இடது பக்க கண்ணுக்கு கீழ் காயமும்,மாணவி ஒருவருக்கு வலது கையில் லேசான சிராய்ப்பு காயமும் ஏற்பட்டது.இருவரும் சிங்காநல்லூரில் உள்ள தனியார் மருத்துவமனைக்கு சிகிச்சைக்காக அனுப்பி வைக்கப்பட்டனர்.பின்னர் இது குறித்து சூலூர் காவல் நிலையத்தில் புகார் தெரிவிக்கப்பட்டு புகாரின் பேரில் சூலூர் போலீசார் வழக்கு பதிவு செய்து விசாரணை மேற்கொண்டு வருகின்றனர் மேலும் பள்ளி பேருந்து விபத்துக்குள்ளான சிசிடிவி காட்சி அங்கிருந்த கோயில் வளாகத்தில் பொருத்தப்பட்டிருந்த சிசிடிவி கேமராவில் பதிவாகியுள்ளது.இந்த காட்சிகள் தற்போது வெளியாகி வலைதளங்களில் வைரலாகி வருகிறது.