காஞ்சிபுரத்தில் பள்ளி வேன் கவிழ்ந்து 9 மாணவர்கள் காயம்

காஞ்சிபுரம் ஏகாம்பரநாதர் கோவில் சன்னிதி தெருவில் உள்ளது ஸ்ரீநாராயணகுரு மெட்ரிக் மேல்நிலைப் பள்ளி. இப் பள்ளி மாணவ - மாணவியரை ஏற்றிச் சென்ற பள்ளி வேனை, ஓட்டுனர் தெய்வசிகாமணி என்பவர் ஓட்டிச் சென்றார். வேனில் 22 மாணவ - மாணவியர் சென்றனர். ராஜகுளம் அருகேயுள்ள இலுப்பப்பட்டு கிராமம் அருகே, சாலையோரம் பள்ளி வேன் கட்டுப்பாடு இழந்து, நேற்று மதியம் 1:00 மணியளவில் கவிழ்ந்தது.

இதில், வேனில் இருந்த ஒன்பது பேர் காயமடைந்தனர். அங்கிருந்த கிராமத்தினர் உடனடியாக ஆம்புலன்சுக்கு தகவல் தெரிவித்து, மாணவ - மாணவியரை மீட்டு, காஞ்சிபுரம் அரசு மருத்துவமனையில் சேர்த்தனர். மருத்துவமனையில் சேர்க்கப்பட்ட ஒன்பது மாணவ - மாணவியரில், ஒரு மாணவருக்கு கையில் பலத்த காயம் ஏற்பட்டுள்ளது. மற்ற மாணவர்கள் சிகிச்சைக்கு பின் வீடு திரும்பினர். வேன் விபத்து குறித்து, காஞ்சி தாலுகா போலீசார், வேன் ஓட்டுனரிடம் விசாரிக்கின்றனர்.