கட்டுப்பாட்டை இழந்த ஸ்கூட்டர் பாறையில் மோதி விபத்து - ஒருவர் பலி

நீலகிரி மாவட்டம் ஊட்டி தூனேரி பகுதியை சேர்ந்தவர் ரத்தினகுமார் (40). இவரது மனைவி ரேணுகா (35). இவர்களின் மகள் ரோகிணி, மகன் ரோகன். இவர்களது உறவினர் எப்பாடு கிராமத்தை சேர்ந்த தங்கவேல். ரத்தினக்குமார், ரேணுகா மற்றும் ரோகிணி ஆகியோர் ஒரு ஸ்கூட்டரிலும், தங்கவேல் மற்றும் ரோகன் வேறேரு இருச்சக்கர வாகனத்திலும் மசினகுடியில் உள்ள மாசி கருப்பட்டி சாமி கோவிலுக்கு ஊட்டியில் இருந்து கல்லட்டி மலைப்பாதை வழியாக மசினகுடி சென்றுள்ளனர்.

செல்லும் வழியில், கல்லட்டி மலைப்பாதையின் 26வது கொண்டை ஊசி வளைவில் ரத்தினகுமார் ஓட்டிச் சென்ற இருச்சக்கர வாகனம் கட்டுப்பாட்டை இழந்து வலது பக்கமிருந்த பாறையில் மோதியதில் ரத்தினகுமார் சம்பவ இடத்திலேயே உயிரிழந்தார். அந்த வழியாக பயணித்தவர்கள் அளித்த தகவலின் அடிப்படையில் காயமடைந்த ரேணுகா மற்றும் ரோகிணியை 108 ஆம்புலன்ஸ் உதவியுடன் மீட்டு ஊட்டி அரசு மருத்துவக்கல்லூரி மருத்துவமனையில் சிகிச்சை பெற்று வருகின்றனர்.