இரவு நேரத்தில் இருசக்கர வாகனத்திற்கு தீ வைப்பு

நாமக்கல் மாவட்டம் பள்ளிபாளையம் காகித ஆலைக்கு செல்லும் சாலையில் பிரேம் நகர் என்ற பகுதியில் வசிப்பவர் கவின்குமார். தனியார் சர்க்கரை ஆலையில் ஆய்வகப்பிரிவில் பணியாற்றும் கவின்குமார் குடும்பத்துடன் வசித்து வருகிறார். இந்நிலையில் வழக்கம் போல நேற்று இரவு தனது விலை உயர்ந்த இருசக்கர வாகனத்தை வீட்டின் முன்பு நிறுத்திவிட்டு வீட்டினுள் சென்று விட்டார். இந்நிலையில் காலை வீட்டின் வெளியே வந்த கவின் குமார் தனது இருசக்கர வாகனத்தில் சீட்டின் மேல் பகுதி பாதி எரிந்த நிலையில் இருப்பதைக் கண்டு அதிர்ச்சி அடைந்தார். மேலும் அருகில் வேறொரு வாகனத்தின் மேலே போர்த்தப்பட்டிருந்த சேலை துணியை தனது வாகனத்தின் மேலே போட்டு தீ வைக்கப்பட்டிருந்தது தெரிய வந்தது. இதனை அடுத்து கவின் குமார் பள்ளிபாளையம் காவல் நிலையத்தில் அளித்த புகாரின் பேரில் போலீசார் விசாரணை மேற்கொண்டு வருகின்றனர். மேலும் இரவு நேரத்தில் இருசக்கர வாகனத்திற்கு தீ வைக்கப்பட்ட சம்பவம் பள்ளிபாளையம் வட்டாரத்தில் அதிர்ச்சியை ஏற்படுத்தியுள்ளது.