லஞ்சம் வாங்கிய சமூக நலத்துறை அலுவலர் கைது

நெல்லை பாளையங்கோட்டை ஊராட்சி ஒன்றிய அலுவலகத்தில் சமூக நலத்துறை விரிவாக்க அலுவலராக பணியாற்றுபவர் பார்வதி மல்லிகா. இவரிடம் பாளையங்கோட்டையைச் சார்ந்த கணவனை இழந்த மகாலட்சுமி என்பவர் தனது மகளின் திருமணத்திற்காக ஈவேரா மணியம்மையார் நினைவு ஏழை விதவை மகள் திருமண நிதி உதவி திட்டத்தின் கீழ் விண்ணப்பித்து அதற்கான ஆவணங்கள் அனைத்துமே அளித்துள்ளார். மனுவை பரிசீலித்த பார்வதி மல்லிகா, நிதி உதவி பெற தனக்கு 2500 ரூபாய் லஞ்சம் வேண்டும் என கேட்டுள்ளதாக கூறப்படுகிறது. இதனை அடுத்து மகாலட்சுமி மாவட்ட லஞ்ச ஒழிப்பு போலீசாரிடம் புகார் அளித்தார்.

புகாரை பெற்றுக்கொண்ட போலீசார் விசாரணை மேற்கொண்டு மகாலட்சுமியிடம் ரசாயன கலவை தடவிய பணத்தை கொடுத்தனர். லஞ்ச ஒழிப்பு போலீசார் ஆலோசனைப்படி பாளையங்கோட்டை ஊராட்சி ஒன்றிய அலுவலகத்திற்கு சென்று பால்வதிமல்லிகாவிடம் பணத்தை கொடுத்த போது அங்கு மறைந்திருந்த நெல்லை லஞ்ச ஒழிப்பு டிஎஸ்பி எஸ் கால் மற்றும் ஆய்வாளர் ஞான ராபின் சிங் உதவி ஆய்வாளர் மாரியப்பன் மற்றும் சீதாராமன் ஆகியோர் அடங்கிய குழுவினர் அவரை கையும் களவுமாக பிடித்து கைது செய்தனர். பணத்தையும் பறிமுதல் செய்தனர்.