வைகாசி விசாகத்தையொட்டி முருகன் கோவில்களில் சிறப்பு வழிபாடு

வைகாசி விசாகத்தையொட்டி சேலத்தில் உள்ள முருகன் கோவில்களில் சிறப்பு வழிபாடு நடைபெற்றது. அதன்படி சேலம் பெரமனூரில் உள்ள கந்தசாமி கோவிலில் வைகாசி விசாகத்தையொட்டி நேற்று முருகருக்கு மஞ்சள், திருநீர் உள்ளிட்ட பல்வேறு வாசனை திரவியங்களால் சிறப்பு அபிஷேகம் செய்யப்பட்டது. தொடர்ந்து சிறப்பு அலங்காரம், மகா தீபாராதனை செய்யப்பட்டது. இதையடுத்து வள்ளி தெய்வானையுடன், சிறப்பு அலங்காரத்தில் கந்தசாமி பக்தர்களுக்கு அருள் பாலித்தார். இதில் அந்த பகுதியை சேர்ந்த ஏராளமானவர்கள் கோவிலுக்கு சென்று சாமி தரிசனம் செய்தனர். பக்தர்களுக்கு அன்னதானம் வழங்கப்பட்டது. இதே போன்று குமரகிரி தண்டாயுதபாணி கோவில், ஜாகீர் அம்மாபாளையத்தில் உள்ள காவடி பழனியாண்டவர் மற்றும் அழகாபுரம், அம்மாபேட்டை உள்ளிட்ட சேலத்தில் உள்ள முருகன் கோவில்களில் வைகாசி விசாக திருவிழாயொட்டி சிறப்பு பூஜைகள் நடைபெற்றன. இதில் அந்தந்த பகுதிகளை சேர்ந்த பக்தர்கள் கலந்து கொண்டு சாமி தரிசனம் செய்தனர்.