காஞ்சிபுரத்தில் மாணவியர் பேரணி

தமிழகம் இலவச கல்வி பயிற்சி மையம், இயற்கை விவசாய பயிற்சி மையம், காஞ்சிபுரம் பச்சையப்பன் மகளிர் கல்லுாரி சார்பில், 100 சதவீதம் ஓட்டுப்பதிவு குறித்த விழிப்புணர்வு பேரணி கீழம்பியில் நடந்தது. காஞ்சிபுரம் கோட்டாட்சியர் கலைவாணி, தேர்தல் விழிப்புணர்வு பேரணியை துவக்கி வைத்தார். இதில், பச்சையப்பன் மகளிர் கல்லுாரி என்.எஸ்.எஸ்., மாணவியர், விவசாய சங்க நிர்வாகிகள், இந்திய செஞ்சிலுவை சங்கத்தினர் உள்ளிட்டோர் பங்கேற்றனர். கீழம்பியில் முக்கிய வீதி வழியாக சென்ற பேரணியில் பங்கேற்ற கல்லுாரி மாணவியர், போடுங்கம்மா ஓட்டு; வாங்காதீங்க நோட்டு, ஓட்டளிப்போம், ஓட்டளிப்போம் 100 சதவீதம் ஓட்டளிப்போம். நம் ஓட்டு, நம் உரிமை உள்ளிட்ட கோஷங்களை எழுப்பியவாறு சென்றனர்.