டாஸ்மாக் கடை பூட்டை உடைத்து மதுபாட்டில்கள் திருட்டு - போலீசார் விசாரணை

குமரி மாவட்டம் நாகர்கோவில் அருகே கள்ளியங்காடு டாஸ்மாக் கடை உள்ளது. நேற்று மதியம் விற்பனையாளர்கள் பாபு, பிரைட், அய்யம்பெருமாள் ஆகியோர் கடையை திறக்க வந்த போது கடையின் பூட்டு உடைக்கப்பட்டு திறந்த நிலையில் கிடந்தது. கடையில் இருந்த பிராந்தி பாட்டில்களை மர்ம நபர்கள் திருடி சென்றது தெரிய வந்தது. இதுகுறித்த புகாரின் பேரில் இரணியல் போலீசார் சம்பவ இடத்திற்கு வந்து விசாரணை நடத்தினர். அப்போது மர்ம நபர்கள் கடையில் பூட்டப்பட்டிருந்த கதவுகளில் உள்ள 5 பூட்டுகளை உடைத்து உள்ளே சென்றது தெரியவந்தது. பணம் எதுவும் திருட்டுபோகவில்லை. கொள்ளையர்கள் 101 குவார்ட்டர் பாட்டில்கள், 2 ஆப் பாட்டில்கள், 13 புல் பாட்டில்கள், 62 பீர் பாட்டில்கள் என 177 மது பாட்டில்களை அள்ளிச் சென்றுள்ளனர். இவற்றின் மதிப்பு ரூ.40760 ஆகும். இதுகுறித்து டாஸ்மாக் மேற்பார்வையாளர் அஜித்மோகன் (52) இரணியல் காவல் நிலையத்தில் புகார் அளித்தார். இரணியல் போலீசார் வழக்குப் பதிவு செய்து விசாரணை நடத்தி வருகின்றனர். சிசிடிவி காமிராக்களை ஆய்வு செய்து வருகின்றனர். ஏற்கனவே இந்த கடை சுவரை துளைத்து மர்ம நபர்கள் பிராந்தி பாட்டில்களை அள்ளிச் சென்ற சம்பவம் நடந்திருந்தது குறிப்பிடத்தக்கது