சாத்தூர் பகுதியில் விரைவில் தாமிரபரணி குடிநீர் விநியோகம்

விருதுநகர் மாவட்டம், சாத்தூர் நகராட்சி மற்றும் சாத்தூர் ஊராட்சி ஒன்றியத்திற்கு உட்பட்ட பகுதியில் மாவட்ட ஆட்சியர் ஜெயசீலன் தலைமையில், சாத்தூர் சட்டமன்ற உறுப்பினர் ரகுராமன் முன்னிலையில், வருவாய் மற்றும் பேரிடர் மேலாண்மைத்துறை அமைச்சர் கே.கே.எஸ்.எஸ்.ஆர்.ராமச்சந்திரன் ரூ.17.06 கோடி மதிப்பிலான புதிய திட்டப்பணிகளுக்கு அடிக்கல் நாட்டி, ரூ.36.55 இலட்சம் மதிப்பிலான முடிவுற்ற பணிகளை பொதுமக்களின் பயன்பாட்டிற்கு திறந்து வைத்தார்.

அதன்படி, சாத்தூர் நகராட்சியில்,அம்ருத் திட்டத்தின் கீழ் ரூ.25 இலட்சம் மதிப்பில், நடைபாதையுடன் கூடிய பூங்காவை திறந்து வைத்து குருலிங்காரத்தில் 15 வது நிதிக்குழு சுகாதார திட்டத்தின் கீழ் ரூ.120 இலட்சம் மதிப்பில் புதிய ஆரம்ப சுகாதார நிலையம் கட்டுவதற்கு அடிக்கல் நாட்டினார். அதனை தொடர்ந்து, மேலக்காந்திநகரில் உள்ள நகராட்சி தொடக்கப்பள்ளியில் மாநில நிதிக்குழு கல்வி மேம்பாட்டு திட்டத்தின் கீழ் ரூ.86 இலட்சம் மதிப்பில் புதியதாக வகுப்பறை மற்றும் மாணவ/மாணவியர்களுக்கு தனித்தனியாக சுகாதார வளாகம் கட்டுவதற்கும் அடிக்கல் நாட்டினார்.

மேலும், சாத்தூர், முக்குராந்தலில் நெடுஞ்சாலைத்துறை சார்பில் ரூ.12.60 கோடி மதிப்பில் சாத்தூர் நகராட்சிக்கு உட்பட்ட மதுரை - கன்னியாகுமரி சாலையில் வாறுகால், நடைபாதை மற்றும் தளகற்கள் பதிக்கும் பணிகளுக்கும், ரூ.2 கோடி மதிப்பில் சாத்தூர்-திருவெங்கடபுரம் சாலையில் இருவழி தடத்திலிருந்து நான்கு வழித்தடமாக மாற்றுதல், வாறுகால் மற்றும் தளகற்கள் பதிக்கும் பணிகளுக்கும் அடிக்கல் நாட்டி பணிகளை துவக்கி வைத்தார்.