விபத்தில் படுகாயம் அடைந்த சிறுவன் சாவு

நாமக்கல் மாவட்டம் மல்லசமுத்திரம் அம்மன் கோவில் தெருவை சேர்ந்தவர் சங்கர் (வயது 55). இவரது மனைவி மைதிலி. இவர்கள் சேலம் புதிய பஸ்நிலையம் அருகே மாவட்ட தி.மு.க. அலுவலகம் முன்பு சாலையோரம் பலூன் வியாபாரம் செய்து வருகின்றனர். இவர்களது மகன் ஹேமத்குமார் (6). நேற்று முன்தினம் இரவு 8.15 மணியளவில் சிறுவன் அங்குள்ள ஒரு ஓட்டலில் பாட்டிலில் தண்ணீர் பிடித்து வந்தபோது, அவ்வழியாக வந்த வேன் மோதியது. இந்த விபத்தில் படுகாயம் அடைந்த சிறுவனை பெற்றோர் மற்றும் அக்கம் பக்கத்தினர் மீட்டு சிகிச்சைக்காக சேலம் அரசு ஆஸ்பத்திரியில் சேர்த்தனர். அங்கு சிகிச்சை பெற்று வந்த சிறுவன் ஹேமத்குமார் நேற்று சிகிச்சை பலனின்றி இறந்துவிட்டான். இதுகுறித்து பள்ளப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.