விபத்தில் காயமடைந்த முதியவர் பலி

நாகை மாவட்டம் திருமருகல் ஒன்றியம் திருக்கண்ணபுரம் ஊராட்சி ராதாரம்பூர் செட்டிகுளத்தெரு பகுதியை சேர்ந்தவர் பொன்னுசாமி மகன் அய்யாவு ( வயது 50) கூலித்தொழிலாளி. இவர் கடந்த 20-ம் தேதி மாலை சீயாத்தமங்கை கைகாட்டி அருகில் மானாம்பேட்டை சாலையில் இருந்து மோட்டர் சைக்கிளில் வந்து திரும்பிய போது எதிரே வந்த அரசு பஸ் மோதி விபத்துக்குள்ளானது.

விபத்தில் தலையில் பலத்த காயமடைந்த அய்யாவு வை அக்கம்பக்கத்தினர் மீட்டு நாகப்பட்டினம் அரசு மருத்துவக் கல்லூரி ஆஸ்பத்திரியில் சிகிச்சைக்காக சேர்த்தனர்.அங்கிருந்து மேல் சிகிச்சைக்காக திருவாரூர் அரசு மருத்துவ கல்லூரி ஆஸ்பத்திரி சேர்க்கப்பட்டு அங்கு தீவிர சிகிச்சை பிரிவில் சிகிச்சை பெற்று வந்த அய்யாவு நேற்று சிகிச்சை பலனின்றி பரிதாபமாக உயிரிழந்தார்.இது குறித்து தகவல் அறிந்த திட்டச்சேரி போலீசார் அவரின் உடலை கைப்பற்றி உடற்கூறு ஆய்விற்கு அனுப்பி வைத்தனர்.மேலும் இது குறித்து வழக்கு பதிவு செய்து விசாரணை மேற்கொண்டு வருகின்றனர்.