ஓமலூர் அருகே 3கூண்டுகள் அமைத்து சிறுத்தையை பிடிக்க வனத்துறையினர் முயற்சி

சேலம் மாவட்டம், ஓமலூர் அருகே உள்ள காருவள்ளி ஊராட்சிக்கு உட்பட்ட கோம்பக்காடு பகுதியில் வசித்து வரும் சீனிவாசன் வளர்த்து வந்த பசு மாட்டை நேற்று முன்தினம் சிறுத்தை ஒன்று கடித்து குதறியது.

இதைத் தொடர்ந்து நேற்று காலை வனத்துறையினர் சிறுத்தையின் கால் தடயங்கள் கொண்டு ஆய்வு செய்த நிலையில் 5க்கும் மேற்பட்ட கண்காணிப்பு கேமராக்களை பொருத்தி கண்காணித்து வந்தனர். இதை தொடர்ந்து நேற்று இரவும் அதே மாட்டை சிறுத்தை கடித்து குதறி சாப்பிட்டு விட்டு சென்றது.

இந்த காட்சி வனத்துறையினர் வைத்த கண்காணிப்பு கேமராவில் பதிவாகியுள்ளது. இதைத்தொடர்ந்து அதே கரடு பகுதியில் வனத்துறையினர் மூன்று கூண்டுகள் வைத்து சிறுத்தையை பிடிக்கும் முயற்சியில் ஈடுபட்டு வருகின்றனர்.