ராமகிருஷ்ண மடத்தின் புதிய தலைவர் மே 12ல் பொறுப்பேற்கிறார்

மதுரை புதுநத்தம் ரோடு ராமகிருஷ்ண மடத்தின் புதிய தலைவராக சுவாமி நித்தியதீபானந்தர் மே 12ல் பொறுப்பேற்கிறார். இம்மடம் ஆன்மிகம் உட்பட பல்வேறு சேவைப் பணிகளை செய்து வருகிறது. மடத்தின் தலைவராக இருக்கும் சுவாமி கமலாத்மானந்தர் இறை பணியை நிறைவு செய்து, காசி மடத்தில் தங்கி தவ வாழ்வை மேற்கொள்ள உள்ளார். எனவே மடத்தின் புதிய தலைவராக சுவாமி நித்தியதீபானந்தர் பொறுப்பேற்க உள்ளார்.இவர் 1991ம் ஆண்டு ராமகிருஷ்ண சங்கத்தில் இறை பணியாற்றிட தன் ஆன்மிக வாழ்வை தொடங்கினார். 2001ல் சன்னியாச தீட்சை பெற்றார். ஜாம்ஷெட்பூர், கோவை, புதுடில்லி ராமகிருஷ்ண மடங்களில் சேவையாற்றியுள்ளார். கொல்கத்தா பேலுாரில் உள்ள மடத்தின் தலைமையிடத்தில் பிரம்மச்சாரிகளுக்காக பயிற்சி அளிக்கும் முகாமில் முதல்வராக இருந்துள்ளார்.