பஸ்சில் கஞ்சா கடத்தி வந்த 2 பேர் கைது !

ஆந்திராவில் இருந்து சேலத்திற்கு பஸ்சில் கஞ்சா கடத்தி வருவதாக குற்றவியல் தடுப்பு பிரிவு (சிஐயூ) இன்ஸ்பெக்டர் ஜெகநாதனுக்கு ரகசிய தகவல் கிடைத்தது. அதன்பேரில் இன்று அதிகாலை 1 மணி அளவில் சேலம் புதிய பேருந்து நிலையத்திற்கு இன்ஸ்பெக்டர் ஜகநாதன் தலைமையிலான போலீசார் சென்று சோதனை நடத்தினர். அப்போது ஐதராபாத்தில் இருந்து சேலம் வந்த பஸ்சில் ஏறி சந்தேகப்படும் படி பையுடன் இருந்த 2பேரை பிடித்து சோதனை நடத்தினர். அதில், பையில் 10 கிலோ கஞ்சா இருந்தது தெரியவந்தது. விசாரணையில் அவர்கள் அன்னதானப்பட்டி சண்முகாநகர் மதுரகாளியம்மன் கோயில் தெருவைச்சேர்ந்த அப்துல்கிரீம் (19), தினேஷ் (20) என்பது தெரியவந்தது. 10 கிலோ கஞ்சாவை பறிமுதல் செய்த போலீசார், 2பேரையும் மாநகர மதுவிலக்கு போலீசில் ஒப்படைத்தனர். அவர்கள் இதுபற்றி வழக்குப்பதிவு செய்து 2 பேரையும் கைது செய்தனர். தொடர்ந்து அவர்களிடம், எங்கிருந்து, யாருக்காக கஞ்சா கடத்தி வந்தனர் என விசாரணை நடத்தி வருகின்றனர்.