சைக்கிள் திருடிய ஆசாமிக்கு போலீசார் வலை விச்சு

பெரம்பலூர் நகராட்சிக்குட்பட்ட அரணாரை கிராமம், வடக்கு தெருவைச் சேர்ந்தவர் தர்மலிங்கம் மகன் செந்தில் முருகேசன்(42) பெரம்பலூரில் செல்போன் கடை வைத்திருக்கும் இவர் தனது வீட்டை பூட்டி விட்டு கடந்த ஜனவரி 18ஆம் தேதி குடும்பத்துடன் வெளியூர் சென்றிருந்த நிலையில் ஜனவரி 22ம் தேதி வீட்டுக்கு வந்து அவர் பார்த்தபோது வீட்டின் முன் நிறுத்தப்பட்டிருந்த 9ஆயிரம் ரூபாய் மதிப்புள்ள புதிய சைக்கிள் காணாமல் போனது தெரிய வந்தது. இதனை அடுத்து வீட்டில் பொருத்தப்பட்டிருந்த சிசிடிவி காட்சிகளை செந்தில் முருகேசன் ஆராய்ந்து பார்த்ததில், ஊதா நிற ஜீன்ஸ் பேண்ட்டும், ஊதா நிற சட்டையும் அணிந்த ஒருவர் இருசக்கர வாகனத்தில் அவரது வீட்டின் அருகே வந்து வாகனத்தை நிறுத்திவிட்டு சுற்றுப்புறம் யாரும் இல்லை என்பதை உறுதி செய்து கொண்டு வீட்டின் கேட்டை திறந்து போர்ட்டிக்கோவில் நின்று கொண்டிருந்த சைக்கிளை தூக்கிச் சென்று, அவர் ஓட்டி வந்த பைக்கின் முன் புறத்தில் வைத்து திருடி எடுத்து சென்றது தெரிய வந்தது. இதனால் அதிர்ச்சியடைந்த செந்தில் முருகேசன் திருட்டு சம்பவம் பற்றி பெரம்பலூர் காவல் நிலையத்தில் புகார் அளித்தார். அந்த புகாரின் பேரில் வழக்கு பதிவு செய்துள்ள போலீசார், சைக்கிள் திருடனை சிசிடிவி காட்சிகளை வைத்து சைக்கிள் திருட்டில் ஈடுபட்ட நபரை தேடி வருகின்றனர். இதே போன்று கடந்த சில வாரங்களுக்கு முன்னர் இவரது வீட்டின் அருகில் உள்ள மற்றொரு வீட்டில் இருந்த சிலிண்டர் ஒன்றையும் பட்டப்பகலில் திருடர்கள் திருடி சென்றிருந்த நிலையில் பெரம்பலூர் நகர் மற்றும் சுற்றுப்புற கிராமங்களில் ஆள் இல்லாத வீடுகளில் அடிக்கடி இது போன்று திருடர்கள் கைவரிசை காட்டி வருகின்றனர் என்பது குறிப்பிடதக்கது.