அரிவாளை காட்டி கொலை மிரட்டல் விடுத்த ரவுடி கைது

தூத்துக்குடி மாவட்ட காவல் கண்காணிப்பாளர் எல். பாலாஜி சரவணன் உத்தரவின்படி கோவில்பட்டி உட்கோட்ட காவல் துணை கண்காணிப்பாளர் வெங்கடேஷ் மேற்பார்வையில் கோவில்பட்டி மேற்கு காவல் நிலைய ஆய்வாளர் கிங்ஸ்லி தேவ் ஆனந்த் தலைமையிலானஸ போலீசார் நேற்று ரோந்து பணியில் ஈடுபட்டிருந்தனர்.

அப்போது கோவில்பட்டி ஏ.கே.எஸ் தியேட்டர் ரோடு பகுதியில் உள்ள ஒரு கடையின் அருகே சந்தேகத்திற்கிடமான முறையில் நின்று கொண்டிருந்தவரை பிடித்து விசாரணை செய்வதில், அவர் வீரவாஞ்சி நகரை சேர்ந்த அங்கையற்கன்னி மகன் மாரிமுத்து (எ) மாரி (எ) கட்டமாரி (35) என்பதும் அவர் அப்பகுதியில் வந்து கொண்டிருந்த ஒருவரை வழிமறித்து அரிவாளை காட்டி மிரட்டி பணத்தை பறித்து விட்டு கொலை மிரட்டல் விடுத்து சென்றதும் தெரியவந்தது. உடனே மேற்படி போலீசார் மாரிமுத்து (எ) மாரி (எ) கட்டமாரியை கைது செய்தனர்.

மேலும் இதுகுறித்து கோவில்பட்டி மேற்கு காவல் நிலைய போலீசார் வழக்குபதிவு செய்து விசாரணை மேற்கொண்டு வருகின்றனர். கைது செய்யப்பட்ட மாரிமுத்து (எ) மாரி (எ) கட்டமாரி மீது ஏற்கனவே கோவில்பட்டி மேற்கு காவல் நிலையத்தில் கொலை முயற்சி வழக்குகள் உட்பட 11 வழக்குகள் உள்ளது குறிப்பிடத்தக்கது.