மோட்டார் சைக்கிளில் வைத்திருந்த ரூ.3.60 லட்சம் திருட்டு

சேலம் மாவட்டம் நடுப்பட்டி ஊராட்சி தளவாய்பட்டி கோம்பை பகுதியை சேர்ந்தவர் முருகேசன் (வயது 54). விவசாயி. இவருக்கு பூக்கள் சாகுபடி செய்ய தேவையான பூ வேர் வாங்குவதற்காக பணம் தேவைப்பட்டுள்ளது. இதற்காக அவர் நேற்று காலை தனது மோட்டார் சைக்கிளில் தீவட்டிப்பட்டியில் உள்ள ஒரு வங்கிக்கு சென்று அவரது வங்கிக்கணக்கில் இருந்து ரூ.3 லட்சத்து 60 ஆயிரத்தை எடுத்துள்ளார்.

பின்னர் அந்த பணத்தை மோட்டார் சைக்கிளில் உள்ள கவரில் வைத்துவிட்டு கறவை மாடுகளுக்கு தீவனத்திற்கு சோளம் வாங்குவதற்கு காடையாம்பட்டி பகுதியில் உள்ள ஒரு மளிகை கடைக்கு சென்றார். அப்போது அவர் மோட்டார் சைக்கிளை கடையின் முன்பு நிறுத்திவிட்டு சாவியை மறந்துவிட்டு மளிகை கடைக்கு சென்றார். பின்னர் முருகேசன் திரும்பி வந்து பார்த்தபோது, மோட்டார் சைக்கிளில் வைத்திருந்த ரூ.3 லட்சத்து 60 ஆயிரத்தை மர்ம நபர்கள் திருடி சென்றிருப்பது தெரியவந்தது.

இதனால் அதிர்ச்சி அடைந்த அவர், இது குறித்து தீவட்டிப்பட்டி போலீசாருக்கு தகவல் தெரிவித்தார். அதன்பேரில், போலீஸ் இன்ஸ்பெக்டர் ஞானசேகர் மற்றும் போலீசார் சம்பவ இடத்துக்கு சென்று விசாரணை நடத்தினர். தொடர்ந்து அந்த மளிகை கடையில் இருந்த கண்காணிப்பு கேமராவில் திருடர்களின் உருவம் ஏதும் பதிவாகி உள்ளதா? என வீடியோ பதிவுகளை பார்வையிட்டு போலீசார் ஆய்வு செய்து வருகின்றனர்.