ரோட்டில் பழுதாகி நின்ற மோட்டார் சைக்கிள் நூதன திருட்டு

கன்னியாகுமரி மாவட்டம், நாகர்கோவில் கோட்டார் ரயில்வே ஸ்டேஷன் ரோடு பகுதியை சேர்ந்தவர் சாமிநாதன். இவர் கோட்டார் பஜாரில் லோடுமேனாக வேலை பார்த்து வருகிறார். இவர் தனது உறவினருக்கு சொந்தமான மோட்டார் சைக்கிளை பயன்படுத்தி வந்தார்.

சம்பவ தினம் சாமிநாதன் மோட்டார் சைக்கிளில் ரயிலடி திடல் பகுதியில் சென்று கொண்டிருந்தபோது, திடீரென மோட்டார் சைக்கிள் நின்று விட்டது. பலமுறை மோட்டார் சைக்கிள் ஸ்டார்ட் செய்தும் ஸ்டார்ட் ஆகவில்லை. இந்த நிலையில் சுமார் 20 வயது மதிக்கத்தக்க வாலிபர் ஒருவர் அந்த வழியாக வந்துள்ளார். அவர் சாமிநாதனிடம் மோட்டார் சைக்கிளை ஸ்டார்ட் செய்து தருவதாக கூறியுள்ளார். இதை அடுத்து சாமிநாதன் மோட்டார் சைக்கிளை அந்த நபரிடம் கொடுத்து விட்டு ஓரமாக நின்று கொண்டு இருந்தார்.

அந்த நபர் மோட்டார் சைக்கிளை ஸ்டார்ட் செய்துவிட்டு கண்ணிமைக்கும் நேரத்திற்குள் அங்கிருந்து மோட்டார் சைக்கிளுடன் தப்பி சென்று விட்டார். இது குறித்து சாமிநாதன் கோட்டாறு போலீசில் புகார் செய்தார்.

போலீசார் வழக்கு பதிவு செய்து விசாரணை மேற்கொண்டு வருகிறார்கள். திருட்டு சம்பவம் நடந்த பகுதியில் உள்ள சிசிடிவி கேமரா காட்சிகளை கைப்பற்றி விசாரணை நடத்தப்பட்டு வருகிறது.