ராமாபுரத்தில் வழிப்பறி - மூவருக்கு காப்பு

ராமாபுரம், திருமலை நகர் பகுதியில், ராமாபுரம் போலீசார் நேற்று முன்தினம் இரவு ரோந்து பணியில் ஈடுபட்டனர். அப்போது, அங்கு சந்தேகத்திற்கிடமாக நின்ற நபர்களை அழைத்த போது, தப்பி ஓடினர். இதையடுத்து, ராமாபுரம் கோத்தாரி நகரில் பதுங்கியிருந்த மூன்று பேரை மடக்கிப் பிடித்தனர். விசாரணையில் அவர்கள், கொளப்பாக்கம் வன்னியர் தெருவைச் சேர்ந்த விக்னேஷ், 20, ராமாபுரம், செந்தமிழ் நகரைச் சேர்ந்த மணிகண்டன்,18, திருவாரூர் மன்னார்குடியைச் சேர்ந்த கஜேந்திரன், 20, எனத் தெரிந்தது. மேலும், இரவு நேரங்களில் தனியாக நடந்து செல்வோரை குறிவைத்து வழிப்பறியில் ஈடுபட்டதும், வீட்டிற்கு வெளியே நிறுத்தப்பட்டிருக்கும் பைக்குகளை திருடி வந்ததும் தெரிந்தது. இவர்களிடமிருந்து திருட்டு பைக், நான்கு மொபைல் போன்கள் ஆகியவற்றை பறிமுதல் செய்தனர். இந்த சம்பவத்தில் தொடர்புடைய மேலும் சிலரை தேடி வருகின்றனர்.