தஞ்சாவூர் ரயில் நிலையத்தில் பயணச்சீட்டு வழங்குமிடம் நாளை முதல் மாற்றம்

தஞ்சாவூர் ரயில் நிலையத்தில் மேம்பாட்டுப் பணிகள் நடைபெறுவதால், பயணச்சீட்டு வழங்குமிடம் சனிக்கிழமை முதல் இடமாற்றம் செய்யப்படுகிறது. இது குறித்து திருச்சி கோட்ட ரயில்வே மேலாளர் அலுவலகம் வெளியிட்டுள்ள செய்திக்குறிப்பு: தஞ்சாவூர் ரயில் நிலையத்தில் ரயில்வே அமைச்சகத்தால் அம்ரித் பாரத் நிலையத் திட்டத்தின் கீழ் மேம்பாட்டுப் பணிகள் வேகமாக மேற்கொள்ளப்படுகின்றன. இப்பணிகள் பல்வேறு கட்டங்களாகத் திட்டமிட்டப்படி உரிய காலத்தில் முடிக்கப்பட்டு வருகின்றன. இந்த மேம்பாட்டுப் பணிகள் காரணமாக முதன்மை நுழைவு வாயிலில் உள்ள பயணச்சீட்டு வழங்குமிடம் இரண்டாவது நுழைவு வாயிலுக்கு சனிக்கிழமை (பிப்.24) இடமாற்றம் செய்யப்படுகிறது. இந்த இடமாற்றத்தைப் பயணிகள், பொதுமக்கள் அறிந்து கொண்டு தங்களது பயணத்தைத் திட்டமிட்டுக் கொள்ளுமாறு கேட்டுக் கொள்ளப்படுகிறது. கட்டுமானக் காலத்தில் பணிகள் சுமூகமாக நடைபெறவும், பயணிகள் சேவையில் இடையூறு ஏற்படுவதைத் தவிர்க்கவும் இந்தத் தற்காலிக இடமாற்றம் செய்யப்பட்டுள்ளது.