பெட்ரோல் பங்க் அருகே மயங்கி விழுந்து வியாபாரி உயிரிழப்பு !!

கன்னியாகுமரி மாவட்டம் மணவளக்குறிச்சி அருகே சேரமங்கலத்தை சேர்ந்தவர் கனகராஜ் (65). பழைய இரும்பு பொருட்கள் வாங்கி வியாபாரம் செய்து வந்தார். நேற்று இரவு கனகராஜ் கூட்டுமங்கலம் பகுதியில் உள்ள பெட்ரோல் பங்க் அருகில் சாலையோரம் செல்லும் போது திடீரென நெஞ்சுவலி ஏற்பட்டது. உடனே அவர் பெட்ரோல் பங்கு ஊழியரிடம் 108 ஆம்புலன்ஸ் அழைக்க கூறினார். பின்னர் அவர் மயங்கி விழுந்தார். 108 ஆம்புலன்ஸ் ஊழியர்கள் விரைந்து வந்து அவரை பரிசோதித்த போது கனகராஜ் ஏற்கனவே இறந்துவிட்டார் என தெரிவித்தனர். இதையடுத்து அவரது மனைவி தங்கம் என்பவருக்கு தகவல் தெரிவிக்கப்பட்டது. அவர் மண்டைக்காடு போலீசில் புகார் செய்தார். போலீசார் வழக்கு பதிவு செய்து, உடலை மீட்டு குமரி அரசு மருத்துவக் கல்லூரி ஆஸ்பத்திரிக்கு அனுப்பி வைத்தனர். மாரடைப்பால் இறந்திருக்கலாம் என கூறப்படுகிறது. போலீசார் விசாரித்து வருகின்றனர்.