கத்தியை காட்டி பணம் பறித்த இருவர் கைது

கரூர் மாவட்டம் உப்பிடமங்கலம் சின்ன கவுண்டனூர் பகுதியைச் சேர்ந்தவர் வெங்கடேசன் 47. இவர் ஜனவரி 10ஆம் தேதி மாலை 7 மணி அளவில் உப்பிடமங்கலம் மார்க்கெட் அருகில் நின்று கொண்டு இருந்தார். அப்போது அங்கு வந்த உப்பிடமங்கலம் வடக்கு கேட் பகுதியைச் சேர்ந்த தயாநிதி, உப்பிடமங்கலம் சின்ன கவுண்டனூர் மேற்கு பகுதியைச் சேர்ந்த விமலேந்திரன் ஆகிய இருவரும் நின்று கொண்டிருந்த வெங்கடேசனிடம் கத்தியை காட்டி மிரட்டி, அவரிடமிருந்து ரூபாய் 500 பறித்துச் சென்றுள்ளனர்.

இது தொடர்பாக வெங்கடேசன் அளித்த புகாரின் பேரில்,சம்பவ இடத்திற்கு சென்று விசாரணை மேற்கொண்ட காவல்துறையினர், சம்பந்தப்பட்ட தயாநிதி மற்றும் விமலேந்திரன் ஆகிய இருவரையும் கைது செய்து, அவர்களை சிறையில் அடைத்து நடவடிக்கை மேற்கொண்டனர் . சிறையில் அடைக்கப்பட்ட இருவர் மீதும் ஏற்கனவே வெள்ளியணை, முசிறி உள்ளிட்ட காவல் நிலையங்களில் வழக்குகள் உள்ளது குறிப்பிடத்தக்கது.