ரெயிலில் கஞ்சா கடத்திய இருவர் கைது

சேலம் போக்குவரத்து புலனாய்வு பிரிவு இன்ஸ்பெக்டர் கணேசன், சப்-இன்ஸ்பெக்டர்கள் சிவாஜி கணேசன், சக்திவேல் மற்றும் போலீசார் சூரமங்கலம் ஜங்சன் பகுதியில் ரோந்து சென்றனர். அங்கு சந்தேகப்படும்படியாக நின்ற 2 பேரை பிடித்து விசாரித்தனர்.

அவர்களிடம் 4 கிலோ கஞ்சா இருப்பது தெரிய வந்தது. போலீசார் அவர்களிடம் விசாரித்த போது, திருவாரூர் அருகே கூத்தாநல்லூரைச் சேர்ந்த ஜெய்னுலாதீன் (வயது 22), காரைக்கால் வீராப்பிள்ளை தோட்டத்தை சேர்ந்த முகமதுகைப் (22) என்பது தெரியவந்தது.

இவர்கள் ஒடிசாவில் இருந்து கஞ்சாவை வாங்கி திருப்பூருக்கு கொண்டு செல்ல சேலம் வரை ரெயிலில் வந்ததும், இங்கிருந்து பஸ்சில் திருப்பூருக்கு கொண்டு செல்ல முயன்றதும் தெரிய வந்தது. இதையடுத்து போலீசார் 2 பேரையும் கைது செய்தனர். அவர்களிடம் இருந்து 4 கிலோ கஞ்சா பறிமுதல் செய்யப்பட்டது.